“БОДЛОГЫН УУЛЗАЛТ II”-ААР “ХҮНСНИЙ ХУВЬСГАЛ” ҮНДЭСНИЙ ХӨДӨЛГӨӨНИЙ ТАЛААР МЭДЭЭЛЭЛ СОНСОЖ, САНАЛ СОЛИЛЦЛОО

Чингэлтэй дүүргийн иргэдийн Төлөөлөгчдийн Хурлаас Монгол Улсын урт хугацааны хөгжлийн бодлого, тогтвортой хөгжлийн үзэл баримтлал, нийслэл, дүүргийн бодлого, зорилт түүний хэрэгжилтийн явц, үр дүнг дүүргийн Төлөөлөгч, удирдлагуудад таниулах бодлогын уулзалтыг тогтмол зохион байгуулахаар болсон.

Өнөөдөр “Бодлогын уулзалт II”-ыг хийлээ. Уулзалтаар Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” үндэсний хөдөлгөөний талаар мэдээлэл сонсож, санал солилцлоо. Танилцуулгыг Ерөнхийлөгчийн Тамгын газрын Хүнсний төсөл хөтөлбөрийн албаны дарга В.Мөнгөнсүх хийсэн юм.

Монгол Улсын Ерөнхийлөгч У.Хүрэлсүх ирэх таван жилд хүнсний гол нэрийн 19 төрлийн бүтээгдэхүүнээр дотоодын хэрэгцээгээ бүрэн хангах зорилго тавьсан. Цаашлаад хүнс экспортлогч улс болох амбицтай ажиллаж байгаа. Монгол Улс хөдөө аж ахуй, хөнгөн аж үйлдвэрийн салбарыг хөгжүүлэхэд төрөөс “Хүнсний хувьсгал”, “Шинэ хоршоо”, “Цагаан алт” гэсэн гурван хөдөлгөөнийг 5-6 хувийн хүүтэй 8.9 их наяд төгрөгөөр санхүүжүүлж байна.

Өнгөрсөн оны байдлаар Монгол Улс хүнс хөдөө аж ахуйн салбар 35 тэрбум төгрөгийн урамшуулал олгосон бол 832.7 тэрбум төгрөгийг хөдөө аж ахуйн үйлдвэрлэлийг дэмжих зээл хэлбэрээр олгожээ. Мөн хүнсний салбарт үйл ажиллагаа явуулж байгаа иргэн, аж ахуйн нэгжийн орлогын албан татварыг 50-90 хувь хөнгөлжээ.