chingelteicouncil

ХОВД АЙМГИЙН ИТХ-ЫН ТӨЛӨӨЛӨГЧИД, АЖЛЫН АЛБАНЫХАН ЧИНГЭЛТЭЙ ДҮҮРГИЙН ИТХ-ЫН ҮЙЛ АЖИЛЛГААТАЙ ТАНИЛЦАЖ, САНАЛ СОЛИЛЦЛОО

Ховд аймгийн ИТХ-ын төлөөлөгчид, Хурлын ажлын албаныхан Чингэлтэй дүүргийн иргэдийн Төлөөлөгчдийн Хурлын үйл ажиллагаатай танилцаж, санал солилцлоо. Чингэлтэй дүүрэг сүүлийн жилүүдэд эрчимтэйгээр газар чөлөөлж, дахин төлөвлөлт хийж орон сууцжуулах бодлогыг хэрэгжүүлж байгаа. Газар чөлөөлөх бодлого нь нийслэлийн хэмжээнд жишиг болж хамгийн сайн хэрэгжиж байгаа дүүрэгт нэрлэгддэг. Дүүрэг 2022 оноос хойш өөрийн хөрөнгөөр газар чөлөөлж буй. Өнгөрсөн онуудад 26 тэрбум төгрөгөөр газар чөлөөлсөн бол энэ онд таван тэрбум төгрөгийг энэ ажилд зарцуулахаар төлөвлөөд байгааг дүүргийн иргэдийн Төлөөлөгчдийн Хурлын дарга Т.Уламбаяр, Нарийн бичгийн дарга бөгөөд Ажлын албаны дарга П.Баянбаатар нар уулзалтын үеэр танилцуулсан юм. Ховд аймгийн тухайд 91 мянга гаруй хүн амтай. Эрдэнэбүрэнгийн усан цахилгаан станцын төсөл, Хөшөөтийн уурхай, Халзан бүргэтэйн орд, баруун бүсийн цемент шохойн үйлдвэр зэрэг улсын хэмжээний томоохон мега төслүүд хэрэгжиж, тэр хэрээр эдийн засаг, хүн ам өсөж, түүнийг дагасан төвлөрөл бий болсоор байгаа. Ингэснээр нийслэлтэй ижил агаар, хөрсний бохирдол, төвлөрөл зэрэг асуудал үүсэж байгааг Ховд аймгийн иргэдийн Төлөөлөгчдийн Хурлын дарга З.Эрхбаяр дурдсан юм. Тиймээс Чингэлтэй дүүргийн газар чөлөөлөх үйл явц, оновчтой бодлого, туршлагыг судлан, нэвтрүүлж, хамтран ажиллах хүсэлтэй байгаагаа тэрбээр илэрхийллээ. Мөн Чингэлтэй дүүрэг, Ховд аймгийн ЖДҮ эрхлэгчдийн бүтээгдэхүүнийг харилцан борлуулахаар тохиролцлоо.