ӨСВӨР НАСНЫ ХҮҮХДҮҮДИЙН SOFT SKILLS ХӨГЖҮҮЛЭХ ЭНТЕРПРАЙЗ ХӨТӨЛБӨР ХЭРЭГЖҮҮЛНЭ

Чингэлтэй дүүргийн иргэдийн Төлөөлөгчдийн Хурал нь “Боловсролын санаачилгууд” төрийн бус байгууллагатай хамтран олон улсын энтерпрайз аргачлалд үндэслэн боловсруулсан жишиг хөтөлбөрөөр дамжуулан хүүхдийн бүтээлч сэтгэлгээ, хүнлэг ур чадваруудыг хөгжүүлэх, цаашид үе тэнгийн чиглүүлэгч багш болоход бэлтгэх, гэмт хэргээс урьдчилсан сэргийлэх мэдлэг мэдээлэл олгох, сургалт эхэллээ. Хөтөлбөрөөр суралцагчид төслийн менежментийн аргачлалд суралцаж, багаар ажиллаж нийгмийн төсөл хөтөлбөр хэрэгжүүлж, салбар салбарын манлайлагч менторуудаас суралцах, хамтдаа хөгжих боломжтой юм. Хөтөлбөрийн ментор бэлтгэх сургалтад ерөнхий боловсролын 13 сургуулийн дунд, ахлах ангийн (8-11-р анги) сурагчид хамрагдах бөгөөд цаашид идэвх санаачилгатай, хариуцлагатай суралцах, нийгмийн эерэг нөлөөлөл үзүүлэх 100 сурагч, 30 багшийг шалгаруулан төсөл хэрэгжүүлэх, бодит үр дүн гаргахад нь чиглүүлж ажиллахаар зохион байгуулж байгаа юм. Энэхүү сургалт дөрөвдүгээр сарын 16-наас ирэх сарын таван хүртэл танхим, цахим хосолсон хэлбэрээр үргэлжилнэ. Сургалтад хамрагдах хүүхдүүдийг сонгон шалгаруулах тухай уулзалт өнөөдөр боллоо. Уулзалтад дүүргийн ерөнхий боловсролын сургуулиудын захирал, сургалтын менежер, нийгмийн ажилтнууд оролцлоо.