Хуралдааныг Чингэлтэй дүүргийн иргэдийн Төлөөлөгчдийн Хурлын дарга бөгөөд Гэмт хэргээс урьдчилан сэргийлэх ажлыг зохицуулах салбар зөвлөлийн дарга Т.Уламбаяр удирдан явуулж, Зөвлөлийн нарийн бичиг бөгөөд Ажлын албаны дарга Д.Уянга болон зөвлөлийн бусад гишүүд оролцож, хэлэлцэх асуудлын төлөвлөгөөнд тусгагдсан асуудлуудыг хэлэлцэн холбогдох тогтоол, шийдвэрийг гаргаж баталгаажуулсан юм.

Хэлэлцэж буй асуудлын хүрээнд зөвлөлийн зарим гишүүн санал гаргаж, үг хэллээ. Тухайлбал, зөвлөл бодлогын хэмжээний ажлуудад түлхүү анхаарч, нөлөөллийн ажлыг сайн хийх хэрэгтэй, хулгайлах, тэр дундаа халаасны хулгайгаас урьдчилан сэргийлэх чиглэлээрх ажлыг ирэх оны төлөвлөгөөнд нэмж оруулах ёстой гэдэг саналыг зөвлөлийн зарим гишүүн гаргасан юм. Чингэлтэй дүүргийн тухайд томоохон зах, худалдааны төв ихтэй учир энэ төрлийн гэмт хэргийн тоо буурахгүй байгаа учраа уг саналыг гаргасан гэдгээ мөн тайлбарлав.

Түүнчлэн энэ онд зөвлөлийн бүрэлдэхүүнийг шинэчлэн батлахдаа олон нийтийн хүлээлт, нийгмийн шаардлагын улмаас төрийн бус байгууллагын төлөөллүүдийг оруулснаа Чингэлтэй дүүргийн иргэдийн Төлөөлөгчдийн Хурлын дарга бөгөөд Гэмт хэргээс урьдчилан сэргийлэх ажлыг зохицуулах салбар зөвлөлийн дарга Т.Уламбаяр онцоллоо.

Тэгвэл олон нийтийн байгууллагын төлөөлийн зүгээс үр дүнд суурилсан төлөвлөлтийн ажлын явцыг тодруулж, ямар нөхцөлөөс ямар хэмжээнд хүрэх вэ гэдгээ урьдчилан тодорхойлсноор зөвлөл ажлаа эхлүүлэх нь зүйтэй гэдэг байр суурийг илэрхийлсэн юм.