ГУДАМЖ, ТАЛБАЙН НЭР, ХАЯГИЙГ ҮНДЭСНИЙ БИЧГЭЭР БИЧИЖ, ХАЯГЖУУЛАХ ТУХАЙ ХЭЛЭЛЦЛЭЭ

Чингэлтэй дүүргийн иргэдийн Төлөөлөгчдийн Хурлын Эрх зүй, нутгийн удирдлагын хөгжлийн хорооны өргөтгөсөн хуралдаан боллоо. Хуралдаанаар Орон нутгийн өмчит төсөвт үйлдвэрийн газар байгуулах тухай, Дүрэм шинэчлэн батлах тухай, Санал уламжлах тухай, Үндэсний бичгээр хаягжуулах тухай, Эрх шилжүүлэх тухай асуудлыг хэлэлцлээ.

Орон нутгийн өмчит төсөвт үйлдвэрийн газар байгуулах тухайд дүүргийн иргэдийн аюулгүй, амар тайван амьдрах нөхцөлийг бүрдүүлэх олон нийтийн аюулгүй байдлыг хангах, гэмт хэрэг зөрчлөөс урьдчилан сэргийлэх чиг үүрэг бүхий “Чингэлтэй дүүргийн Теле камерын хяналтын дэд” төв орон нутгийн өмчит төсөвт үйлдвэрийн газар байгуулахаар төсөл танилцууллаа.

Чингэлтэй дүүрэг, Японы Яйзү хот хоорондын хамтын ажиллагааг бэхжүүлэх, хоёр орны соёлыг түгээх, сурталчлах зорилгоор 19 дүгээр хорооны тодорхой хэсэгт Яйзү хотын нэрэмжит гудамж болгох санал гаргасныг Эрх зүй, нутгийн удирдлагын хөгжлийн хороо мөн хэлэлцсэн юм. Түүнчлэн үндэсний хэл, бичгийн хэрэглээний уламжлалыг хадгалах, нийтийн болон албаны түвшинд хэрэглэж хэвшүүлэх, иргэн бүрийн үндэсний хэл, бичгийн боловсролыг төгөлдөржүүлж, нэгдмэл үнэт зүйл болгон төлөвшүүлэх зорилгоор дүүргийн харьяа төр захиргааны байгууллага, нийтийн эзэмшлийн гудамж, талбайн нэр, хаягийг үндэсний бичгээр бичиж, хаягжуулах тухай асуудлыг хэлэлцэв. Хуралдаанд Эрх зүй, нутгийн удирдлагын хөгжлийн хорооны дарга Д.Мөнхтөр, гишүүд Х.Алтаншагай Н.Бямбагэрэл, Б.Ерөө, Э.Уянга, А.Эрдэнэбат, Хурлын Төлөөлөгчид, Хурлын Нарийн бичгийн дарга бөгөөд Ажлын албаны дарга П.Баянбаатар, холбогдох хэлтэс, албадын дарга нар оролцлоо.