ЭНЭ ОНД 29 БАЙРШИЛД 161 НЭГЖ ТАЛБАРЫГ ЧӨЛӨӨЛӨХӨӨР ТӨЛӨВЛӨӨД БАЙНА

Ногоон хөгжил, газрын харилцааны хорооны өчигдрийн хурлаар дүүргийн энэ оны Газар зохион байгуулалтын төлөвлөгөөнд нэмэлт, өөрчлөлт оруулах болон зарим хорооны гудамжны нэр, хаягийн зураг батлах тухай хэлэлцсэн юм.

Чингэлтэй дүүрэг энэ онд 29 байршилд 161 нэгж талбарт газар чөлөөлөх бол 19 байршлын 383 газрын эзэмших эрхийн гэрчилгээ шинээр олгохоор Газар зохион байгуулалтын төлөвлөгөөний нэмэлт, өөрчлөлтөд тусгасан. 

Давхар гарааштай авто зогсоол, явган хүний зам, талбай, дулааны шугам, сургууль, цэцэрлэг барих газар, орц, гарц гаргах зэрэг шаардлагын дагуу газар чөлөөлнө. Харин газар эзэмших эрхийн гэрчилгээ шинээр олгох тухайд тухайн газраа олон жил амьдарсан ч гэрчилгээгээ авч чадаагүй оршин суугчдын гэрчилгээг олгох асуудлыг судлах юм. Хурлын хорооны гишүүдийн зүгээс шинээр барилга байгууламж барьж, байгуулах газрыг ямар төлөвлөлтийн хүрээнд чөлөөлж байгаа, дүүргийн төлөвлөлттэй хэрхэн уялдаж байгаа талаар тодорхой тусгахыг санууллаа.

Мөн Хаягжуулалтын тухай хууль, НИТХ-ын Улаанбаатар хотын гудамж, талбайд нэр өгөх, нэрэмжит болгох, барилга, байгууламжид дугаар олгох журам”, “Алсын хараа-2050” Монгол Улсын урт хугацааны хөгжлийн бодлогод үндэслэн зарим хорооны нэр, хаягийг тодорхой болгож, гудамж, талбайн нэр, байшин барилгын хаягийн нэгдсэн стандарт хангуулж, хотын соёлыг нэмэгдүүлэх төлөвлөөд байна.