Хийн түлшний тасралтгүй, хүртээмжтэй хангамжийг бүрдүүлэх зорилгоор дүүргийн хэмжээнд хийн түлш борлуулах 24 цэг байгуулахаар төлөвлөсөн бөгөөд үүнээс 4 цэгийг ашиглалтад оруулж, иргэдэд үйлчилгээ үзүүлж эхэлсэн. Эдгээр борлуулах цэгүүдээр үйлчлүүлэх иргэд “Хотула” аппликейшн, гар утасны дугаар эсвэл иргэний үнэмлэхээ ашиглан киоск машинд QR код уншуулснаар хэрэглэгчийн мэдээлэл системд автоматаар бүртгэгдэнэ. Үүний дараа хэрэглэж дууссан хийн баллоныг жинлэн буцаан өгч, дүүрэн баллоноор солих боломжтой.

Буцаан өгч буй баллонд тодорхой хэмжээний хий үлдсэн тохиолдолд тухайн үлдэгдлийг тооцож, шинээр авч буй баллоны үнийн зөрүүг автоматаар бодож төлбөрийг тооцдог ухаалаг төлбөрийн системийг мөн нэвтрүүлсэн юм.

Хийн түлш нь өрхийн хэрэглээнд шинэ технологи тул хийн зуух авсан айл өрхүүдэд аюулгүй ажиллагаа, зөв хэрэглээний сургалтыг “Тавантолгой Түлш” ХК-тай хамтран зохион байгуулж байна. Сургалтаар хий алдагдал илрүүлэх, галын аюулгүй байдал, төхөөрөмжийн зөв ашиглалт, ослоос урьдчилан сэргийлэх мэдлэг мэдээллийг өгч, иргэдийн аюулгүй хэрэглээг хангах арга хэмжээг авч байна.