Нийслэлийн Чингэлтэй дүүргийн Иргэдийн Төлөөлөгчдийн Хурлаас 1-19 дүгээр хороодын Иргэдийн нийтийн Хурлын дарга нарыг чадавхжуулах сургалтыг хагас жил тутам зохион байгуулж, мэргэжил арга зүйгээр ханган ажиллаж байна. Энэ хүрээнд аравдугаар сарын 30-ний өдөр 1 дүгээр хорооны Иргэний танхимд ээлжит сургалтыг зохион байгууллаа.
Сургалтын үйл ажиллагааг Иргэдийн Төлөөлөгчдийн Хурлын Иргэний оролцоо, олон нийттэй харилцах хэлтсийн дарга Т.Уламбаяр нээж, Хүний нөөцийн удирдлагын академийн сургагч багш С.Лхагвасүх Монгол Улсын Засаг захиргааны нэгж, түүний удирдлагын тухай хуулийн танилцуулга, Иргэдийн нийтийн хурал ба хамтын ажиллагаа сэдвээр мэдээлэл өгч, оролцогчдын сонирхсон асуултад хариулт өгч ярилцлаа. 

Мөн үеэр Монгол улсын Засаг захиргааны нэгж, түүний удирдлагын тухай хуулийг дэлхийн орнуудын жишээтэй холбон тайлбарлаж, цаашид Иргэдийн нийтийн хурлын үйл ажиллагааны цар хүрээг хэрхэн тэлэх, үйл ажиллагаа зохион байгуулахад юуг анхаарвал зохих, арга зүйн зөвлөгөөг өгсөн юм.